Chrisboom besorgen met polizeilicher Erlaubnis
Mit freundlicher Genehmigung entnommen aus „Dat Rüötsche Chrisdagsbauk“, Heimat- und Verkehrsverein Radevormwald, 2. Auflage 2004
Ett ess alt lange hia. Do gungen dä Hugo un dä Kaal in de dullen Juffert, üm en Chrisboom te besorgen. Unger de Juppe ne kleine Boomsiagge. Endlich hadden se twee schöne Bööme gefungen. Ritsche, ratsche, aff do met un op Heme ahn. Kuhm woren se 100 Meter gegangen, do horden se Schri’ette.
„Lott vie biätter dä Bööme fallen loaten“, mein dä Hugo, „wi’ecker weet, wär dat ess!“ Un richdig, ett woren twee rüötsche Schandarmen op Striepengang. Me kannde seck. „Guodden Morgen, guodden Morgen!“ Dä Kaal hadde Angst, dat dä Siagge ut dr Juppe foll un holl seck hä Hänge vö dat Liew.
„Haben Sie Schmerzen?“, mein dä ehne Schandarm. „Jo, un wie“, mein dä Jung, „eck maut wuoll wat falschet gegiatten hiäwwen.“ „Und was machen Sie hier?“, gung dä Disput wigger. „Och“, mein dä Hugo, „ett ess so schön Wia, do wollt vie ens gäne in de Büsche. Un ett?“ „Ja wissen Sie, es ist kurz vor Weihnachten. Es werden so viele Bäume geklaut, da muß man nach dem Rechten sehen!“
„Richtig, richtig“, mein dä Hugo, „ett ess ohk te schlimm. Dä Lüh asen jo förmlich met dän Böömen. Mancher schni’ett seck ehnen aff, un wenn hä dann ehnen schöneren finget, lotten se dän erschden liggen. Gerade hie, knapp 100 Meter terügge, do liggen ohk twee!“ „Tatsächlich, wo?“ Alle 4 Mann dohenn – do loggen dä Bööme.
„Habt Ihr zwei schon einen Weihnachtsbaum?“, mein dä ehne Schupo. „Nee“, mein dä Hugo, „dä huollt vie uns ümmer in ehner rüötschen Gärtnerigge.“ Do mein dä angere Schandiz: „Na, dann nehmt doch diese hier, sollen die hier vergammeln? Sind doch prima Bäume!“ „Jo wenn vie dat dürwen?“ – „Natürlich.“
So trocken dä twee rüötschen Schliekefänger grinsend op Heme ahn, met selwst geklauden Chrisböömen met polizeilicher Erlaubnis. Wat sall eck säggen, ett wu’erden dä schönsden Fi’erdage seit Johren.
(Rudi Wohlfahrt)
Mit freundlicher Genehmigung entnommen aus „Dat Rüötsche Chrisdagsbauk“, Heimat- und Verkehrsverein Radevormwald, 2. Auflage 2004
|
